درس في الكرامة

آخر مرة تفرجت فواحد خالي قبل مايموت اتيرحم ربي كان حكواتي تايحكي حكايات فالحلاقي كان عشير الواليد فالحرفة ملي مات الواليد الله يرحمو ستمر هو بوحدو… المهم آخر مرة تفرجت فيه فتالمارشيت نالدشيرة كانو المحبين دالنمط ديالو دايرين بيه لكن حداه كانت حلقة ديال الجرة و لوطار و داك الراجل لي كايشطح بلبس العيالات و كانت الدنيا عندهوم عامرا و مخدمين داك البوق ديال الحلاقي… المهم الضجيج المنضم… خالي الحسن كان خدام بلا ميكرو كيما العادة و دايرين بيه شويا د الناس و كانو عطاوه شي صريف دراهم شادهوم فيديه و تايحكي لكن شاف بلي راه دوك الناس واخا هكاك عقلهوم عند الجرة مامسوقينش ليه مزيان… و هو يقول ليهوم دابا نتوما لاش واقفين عليا ماكاتصنطوش ليا كاع زعما بقيت فيكوم ولا بقات فيكوم درهم لي عطيتو… زعما هوما ظاهريا كايشجعوه وايني باطنيا عقلهوم فالرشوق… و هو يشير بدوك الدراهم جيهت الحلقة د الجرة و قال ليهوم يالله تابعايات تاريالين نون زعما تبعو ريالاتكم ههههه المصمير… تفرتكات الجوقة و جمع الهيضورة ديالو… خلاصة الواقعة أنه بزاف د الناس كايحبو الفنان الأمازيغي شفويا أما فعليا فيتضح العكس … و من جهة أخرى نهار شيرت على داك بني بوهاس بالقرعة فواحد السهرة تفكرت خالي فديك اللحضة ههههه… الكرامة أولى من كل شيء… على كل حال خالي الحلايقي ربا أجيال و عندو اولادو دايرين ليزافير صحاح برا و داخل البلاد و لكن بقا خدام فالحلقة حتى آخر أيامه لأنه يعشق تلك الحرفة و بالحكايات ديالو التاريخية كان كايساهم فإحياء الثرات الأمازيغي و ماتنازلش واخا كانو المتطفلين كثار و ماعمرو بغا يخدم البوق سولتو واحد النهار علاش قال ليا الحكاية خاصها تدوز من الفم للودن بلا سمسار بيناتهوم… واسير قنعو نتا هههه… على كل حال خالي و بحال خالي منهوم بزاف… الله يجيب للي يفهنا و مايعطيناش و حقاقات تعلم بان التصمير و الزكير و راثي عندنا حنا فالعائلة نموتو و مانتحناوش و لله الحمد… أد كولو فلاتون ايساهل ربي

نحن من يحتقرنا

بداية الألفينيات نظمت جمعية كبيرة ديال تجار سوس سهرة ضخمة فالدار البيضاء فلافوار ولا سميتو المهم بلاصت المعرض الدولي و الرئيس ديالها كان مناضل معانا ماشي مناضل نيييت وايني شاد الصف أوصافي و كنت من ضمن المشاركين مع فنانة أمازيغية معروفة… المهم السهرة عامرة نيت ديال بصح و خلال السهرة كان تكريم ديال هرم من أهرام الأغنية المغربية العصرية بالدارجة… تعطاه شيك قدام الجمهور فيه 5 د المليون و سوارت و وراق طوموبيل… ياسلام على تكريم… المهم ساليت الفقرة ديالي دخلت للبريتش ديالي فالكواليس كانتسنا نتخلص و البريتش ديالي حدا البريتش د الفنانة و ياخوتي سالات السهرة وانا باقي كانتسنا و تقطع الحس واحد شويا سمعت الصداع فالبريتش د الجيران طليت لقيتهوم كايحسبو فالدراهم و الشقافي… ناري غايخلصوها بالحديد و ربعمياوات… المهم كملو ليها داكشي شارجاتو فالبليزا و خرجو من الباب لاخر… جيت نتخلص مالقيت تاواحد مابان ليا غير واحد من المنظمين شنقت عليه قال ليا أودي راني غير خدام تا أنا ماتفرقت معاه تا عطاني نمرت الفيكس د الدار د الباطرون لي نظم داك الزمر مشيت لأقرب تيليفون د الدراهم عيطت للنمرة جاوبات المرا ديالو ألو شكون معايا… دابا ايلا قلت ليها أسلال راكوم عارفين هههه المهم بسرعة قلت ليها عافاك سي فلان واش دخل قالت ليا ناعس شكون بغاه و أنا نقول ليها الإدارة العامة د الأمن الخاص… هي ركزات عالأمن تخلعات مدات التيليفون للراجل مابقاش ناعس… ألو نعام سيدي… لالاك هادي فيناهو رزقي أسلال هذا… الله يهديك أسلال واش أنا غاناكلك فرزق واش نسيتي شحال دوزنا د النضال غدا الصباح نتلاقاو عند فلان تيتيتي تيتاتا سالات خمس الدراهم… تيقتو… ماعندي فلوس لوطيل مشيت تقهويت فالمحطة تال الصباح عيطت على النمرة عيطت جاوباتني المرا ألو… ابه لقيتيه يالله خرج شاد الطريق للصويرة… المهم رئيس جمعية التجار من ديك الساع راه باقي مسافر إلى يومنا هذا و مازال كانتسناه يعطيني رزقي… على كل حال هادي حكاية و قعات حكيتها ليكوم غير باش تعرفو أننا كانتكرموا مزيااااان من طرف دياولنا ههههه… ماتقلقوش ايلا تانعاود ليكوم هاد النويطات الخايبين راه كاينين نويطات زوينين غير نسالي الخايب نجيكوم للزين المسرار هههه… أد كولو فلاتون ايساهل ربي

LEAVE A REPLY

Please enter your comment!
Please enter your name here